لە زیندانێكی پارێزگای موسەنا 21 بەندكراو هەڵدێن

7 رۆژ پێش ئێستا ژمارەی بینین: 50 جار

ئەمڕۆ یەكشەممە 2021/5/2 21 ژمارەیەك بەندكراو لە زیندانی هیلال لە پارێزگای موسەنا لە باشوری عێراق هەڵاتون.
ئەحمەد مەنفی جەودە پارێزگاری موسەنا رایگەیاند: سەعات 3ی بەرەبەیانی ئەمڕۆ بەندكراوەكان هێرشیان كردۆتە سەر یەكێك لە پاسەوانەكانی دەرگای سەرەكی زیندانییەكەو بەهۆیەوە 21 بەندكراو هەڵاتون.
ووتیشی: هێزە ئەمنییەكان خراونەتەوە حاڵەتی ئامادەباشییەوەو توانییان 10 لەو بەندكراوە هەڵاتوانە دەستگیربكەنەوەو پرۆسەی گەڕانیش بەدوای سەرجەم هەڵاتوەكانی دیكە بەردەوامە.
 پارێزگاری موسەنا، لە بەیاننامەیەكدا ئاشكرایكرد: داوای دەستبەسەراكردنی هێزی سەرپەرشتیاری بنكەكەی كردووە كە سەر بەبەشی نەهێشتنی ماددە هۆشبەرەكانن و لەرووی كارگێڕییەوە پەیوەندییەكان بەوەزارەتی ناوخۆوە هەیە بۆ لێكۆڵینەوە لەهۆكاری هەڵاتنی بەندكراوان. 
زیندانی هیلال لە پارێزگای موسەنا، تایبەتە بەو كەسانەی بازرگانی بەماددە هۆشبەرەكانەوە دەكەن یان دەستیان لەكاری تیرۆریستی هەبووە.

نەخشە دانان و پەرەپێدان لەلایەن تێراتارگێت بۆ زیرەکی دیجیتاڵی و داهێنانەکانی ئای تی