سبەینێ تاقیكردنەوەكانی وەرزی یەكەمی خوێندن لە هەرێمی كوردستان دەستپێدەكات.
مامۆستا تریفە محمد, بەڕێوبەری پەروەردەی ڕۆژهەڵاتی سلێمانی، تایبەت بە دەنگی گەلی كوردستان وتی: سبەینێ چوارشەممە، تاقیكردنەوەكانی كۆتا وەرزی یەكەم لە سەرجەم ناوەندەكانی خوێندن جگە لە بازنەی یەكەم واتە پۆلی (یەك دوو سێی) بنەڕەتی كە پێشتر هەڵسەنگاندنیان بۆكراوە, دەستپێدەكات لە پۆلی 4 تا پۆلی 12.
ئاماژەی بەوەشكرد: دەستخۆشی لە دەستەی كارگێڕی و مامۆستایان دەكەم بۆ خۆ ئامادەكردنیان بەشێوەیەكی دروست و هێمنانە, كە هەریەك لە خوێندنگاكان بەشێوەیەكی زۆرجوان هۆڵەكانی تاقیكردنەوەیان ئامادەكردووە و كەشوهەوایەكی لەباریان خولقاندووە بۆ سەرجەم قوتابیان بۆ ئەوەی تاقیكردنەوەكان بە سەركەوتووی بە هێمنی بەڕێوەبچێت, وتیشی: پێشتر كۆبوونەوەمان لەگەڵ مامۆستایان كردووە هەموو رێنماییەكانیان لە بەردەمدایە و هەمووشیان پایەندن بە رێنماییەكانی وەزارەتی پەروەردەوە.
مامۆستا تریفە محمد بەڕێوبەری پەروەردەی ڕۆژهەڵاتی سلێمانی راشیگەیاند: داوا لە خوێندكاران دەكەم كە بەشێوەیەكی زۆر هێمنانەو لەسەرخۆ بەشداری تاقیكردنەوەكان بكەنو پابەندن بن بەسەرجەم یاساو رێنماییەكانی تاقیكردنەوەكان.
